Framvegis býður upp á fjarnám í beinni. Þannig er fjarneminn þátttakandi í kennslustundinni/námskeiðinu á rauntíma rétt eins og sá sem er á staðnum. Fjarnemi getur einnig sjálfur verið sýnilegur í stofunni ef hann er með vefmyndavél, en það er ekki skilyrði.
Hvaða búnað þarf ég til að taka þátt: Nýleg tölva, góð nettenging, heyrnartól með hljóðnema (hljóðnemi er innbyggður í flestar fartölvur), vefmyndavél (á aðeins við ef þú vilt vera sýnileg/-ur í stofunni). Ekki er hægt að tengjast fjarkennslunni með stýrikerfi eldra en 2007 (t.d Windows XP, Windows vista). Nota þarf netvafran Windows Explorer við fjarkennslu.
Hér að neðan er að finna skref fyrir skref leiðbeiningar um hvernig þú tengist fjarnámskeiði í beinni í fyrsta sinn.
Áður en námskeið hefst fær þátttakandi sendan tölvupóst með krækju sem vísar þátttakanda inn á síðu þar sem hann getur fylgst með námskeiðinu þegar kennsla fer fram. Þess vegna er mjög mikilvægt að skrá rétt netfang.
Vendikennsla/spegluð kennsla er nýstárleg kennsluaðferð sem er að ryðja sér til rúms á Íslandi, meðal annars hjá Framvegis – miðstöð símenntunar. Með vendikennslu/speglaðri kennslu er hefðbundinni kennslu snúið við. Kynningar og fyrirlestrar eru vistaðir á internetinu og gerðir aðgengilegir nemendum í viðkomandi námi. Nemendur geta horft og hlustað á kynningarnar, hvar og hvenær sem er – eins oft og þeim sýnist.
Þeir geta jafnframt sent kennurum (eða samnemendum sínum) spurningar um efnið og fengið svör á netinu. Þá eru nemendur hvattir til að nota netið til að finna heppilegt kennsluefni.
Vendikennsla/spegluð kennsla breytir hefðbundnu fyrirkomulagi á kennslustundum töluvert. Í stað þess að nemendur hlýði á kynningar í kennslustundum þá vinna þeir þar verkefnin, oftast saman í hóp, og kennarar aðstoða eftir þörfum við úrlausnir. Kennslustundirnar verða því lifandi ferli sem virkjar nemendur með skemmtilegum hætti. Kennsluaðferðin krefst þess að nemendur mæti undirbúnir til leiks til að vinnan í kennslustundum nýtist þeim sem skyldi.