Náms – og starfsráðgjafar hjá Framvegis eru til staðar fyrir þig ef þú ert eldri en 20 ára og hefur ekki útskrifast úr framhaldsskóla. 

Boðið er upp á einstaklingsviðtöl og er hægt að panta tíma með því að senda tölvupóst eða hringja í síma 5811900.

Við leggjum áherslu á að:

  • finna leiðir til að efla og styrkja einstaklinga
  • upplýsa um nám og störf
  • veita ráðgjöf um raunfærnimat
  • aðstoða við gerð ferilskrár og/eða færnimöppu
  • takast á við hindranir í námi eða starfi
  • aðstoða ef þig langar til að breyta um starfsferil
  • finna hvar hæfileikum er best varið t.d. með áhugakönnun

Ef áhugi er fyrir hendi á því sem einstaklingur gerir eru meiri líkur á vellíðan og velgengni á hvaða vettvangi sem er. Þetta á líka við um nám og störf. Það er því mikilvægt fyrir árangur og vellíðan í námi og starfi að velja sér vettvang sem fellur að áhugasviði hvers og eins. Það getur reynst flókið að tengja áhugamál saman við nám og störf en þar geta áhugakannanir og náms- og starfsráðgjafar komið að gagni. Náms- og starfsráðgjafar Framvegis leggja fyrir áhugakönnun og lesa úr niðurstöðum með einstaklingum. Náms- og starfsráðgjafar eru Helga Tryggvadóttir og Ingibjörg Kristinsdóttir.